Om DKS Hordaland
Den kulturelle skulesekken er eit nasjonalt satsingsfelt med overordna målsettingar. Hordaland fylkeskommune har vedteke fylgjande mål for Den kulturelle skulesekken:
- å medverka til at elevar i skulen får eit profesjonelt kulturtilbod.
- å leggje til rette for at elevar i skulen skal få tilgang til, gjera seg kjende med og få eit positivt forhold til kunst- og kulturuttrykk av alle slag.
- å medverka til å utvikle ei heilskapleg integrering av kunstnarlege og kulturelle uttrykk i realiseringa av skulen sine læringsmål.
- å gje born oppleving av kunst og styrka deira eiga skaparevne.
- å styrkje born si evne til å stille spørsmål, og stimulere til kritisk vurdering.
Den kulturelle skulesekken (DKS) tek sikte på å utvikla ei heilskapleg integrering av kunstnarlege og kulturelle uttrykk i realiseringa av læringsmåla i skulen, mellom anna ved å trekka inn kunstnarar og kulturarbeidarar og nytta kunst- og kulturinstitusjonane sine ressursar og kompetanse i skulens verksemd. Verksemda er tufta på eit godt samarbeid mellom kultur- og skulesektor på alle organisatoriske nivå. Målsettinga er at alle born skal få høve til å oppleva kunst og kultur av høg kvalitet, med håp om at dei får, og vidareutviklar, eit aktivt og positivt forhold til kunst- og kulturuttrykk.
Hordaland fylkeskommune ynskjer å utvikla Den kulturelle skulesekken i nært samarbeid med kommunane og vil tena som sørvisorgan, regional samordnar og utviklar.
Eitt av måla for verksemda er å få til dynamisk samhandling og dialog mellom lokale, regionale og (inter)nasjonale kunstnarar og kunstinstitusjonar, der desse gjensidig kan gjera kvarandre rikare og saman medverka i realiseringa av Den kulturelle skulesekken.
Vidare ynskjer Den kulturelle skulesekken i Hordaland å samarbeida tett med relevante utdanningsinstitusjonar og med ABM-institusjonar. Målet er å gje born og unge gode kunst- og kulturtilbod til inspirasjon og varig verdi.
DKS i grunn- og vidaregåande skule
I Hordaland får både grunnskulen og den vidaregåande skulen tilbod gjennom DKS i fylket. DKS i grunnskulen er vel etablert, og frå og med skuleåret 2007-2008 har også ein del vidaregåande skular fått tilbod.
For å sikre eit godt samarbeid mellom skulene og kulturlivet, og for å sikre forankring i begge sektorane, er det i arbeidet med DKS i vidaregåande skule oppretta et samarbeid mellom DKS og Opplæringsavdelinga i fylket. På grunnskulenivå samarbeider DKS med Fylkesmannen i Hordaland.
Meir om DKS i vidaregåande skule